​Alisson manah Liverpool-in £62m an thehchhuak

18th July 2018, 02:07AM

Liverpool chuan an mamawh tak goalkeeper tha lei turin tun nipui bazar inhawn lai hian an thawkchhuak ta chur chur mai.

Season liamta Champions League-a an hmachhawn AS Roma goalkeeper Alisson chu lei tumin hma an la chhunzawm zel a, Liverpool hian Alisson manah £62m an inhuam niin bbc chuan a tarlang.

Roma chuan Alisson lei tuma dawrtu an nei ngei tih media ten an tarlang a, hetih lai hian £66m aia tlawm chuan hralh an tum loh thu an sawi nia report a ni bawk.

Brazil club Internacional tana bul tan Alisson hian kum hnih chhung chu Roma tan a khel tawh a, kum 25 mi Brazilian goalkeeper hian season liamta khan Serie A game 37 a khel.

Champions League final-a a chetsual avangin fans lamin an dem nasa hle, hetih lai hian Liverpool boss Klopp chuan an goalkeeper Karius chu a chhan tlat a. Mahse kar hmasa mai khai pre-season friendly match-ah Tranmere an hmachhawn tumin Karius hian tihsual a neih leh tak avangin Klopp chuan goalkeeper thar lak ngei a tum ruh ta hle niin a lang.

Liverpool-in lak an tum Alisson hian kumin World Cup-ah khan an ram Brazil tan goal vengin; an match zawng zawng a khel kim vek a, game 5 atangin clean sheets vawi thum lai a nei thei a ni.

Copyright © inkhel.com 2024. All rights reserved.