​Aizawl FC khan chak an phu zawk- East Bengal coach

21st February 2017, 04:02AM

Aizawl FC-in team țha an nihzia an lantir chhunzawm zel a, Thawhtanni tlai khan RG Stadium, Mualpuiah I-League hmahruaitu East Bengal chu R.Laldanmawia goal khat thun hmangin an hneh a, point khat chauhin table hmahruaitu East Bengal hi an pha lo tawh a ni.

Inkhelh banah East Bengal coach Trevor Morgan chuan, "Result mak tak a ni pawhin ka hre lo, a chhan chu Aizawl FC kha an khel țha zawk a, team țha zawk an chak a ni mai.

"Kolkata ațanga lo kal team lian kan nih avang ringawtin kan chak ngei ngei dawn tihna a ni lo. Chak tur chuan kan thawhrim a ngai. First half-a kan khelh dan kha ni hnih chhung kan zir a, nimahsela awmze nei pawhin kan khel chhuak thei lo. Second half-ah khan kan khelh țhin dan pangngaiin ka thlak leh ringawt a ni," tiin Aizawl FC chu team țha zawk an nih thu leh a naute khelh dana a lawm loh thu a sawi.

Tun season-a East Bengal captain Didika'n(Lalrindika Rlate) inkhel bul a țan lo a, second half-ah tlan luh tir nimahse Kolkata team a chak pui zo bik lo. Morgan chuan, "Kan game hnuhnung berah khan a chau hle a, darkar khat khelh tlin a nih kha chuan a tha a chat nghe nghe. Hahdam a mamawh a, vawiinah pawh khan khelh tir loh tawp duh mah ila kan khelh chhiat em avangin ka luhtir a ngaih phah a ni," tiin Lunglei tlangval Didika khelh loh chhan a sawi.

Copyright © inkhel.com 2024. All rights reserved.