MC Dowell's No 1 Soda Mizoram Premier League Season 5 League round match hnuhnungber chu November ni 26, Inrinni zan khan semifinal lut ve ve tawh Aizawl FC leh Chanmari FC ten an khel a, Aizawl FC chuan 2-1 in hnehna an chang a ni. He inkhelah hian Aizawl FC defender Jonathan Lalhriatkima chu Man of the match-ah thlan a ni.
MPL5 League round chu khelh zawh a ni a, Zo United an relegate a, Bethlehem Vengthlang FC, Chanmari FC leh Chanmari West FC te chuan semi final an khel dawn ta a ni. League hmahruaitu chu Bethlehem Vengthlang FC an ni a, table-a palina Chanmari West FC nen semi final an khel anga, League-a pahnihna Chanmari FC leh pathumna Aizawl FC te chu semi final-ah an inhmachhawn ve dawn bawk a ni.
Semi final hi Two-legged tie a ni dawn a, home and away erawh a awm dawn lo. Hei vang hian away goal rule hman a ni dawn lova. Vawi hnih an inkhelh naa an la inhnehtawk a nih chuan extra time khelh a ni anga, chuta an la inhnehtawk leh a nih chuan penalty shootout hmanga chak zawk zawn a ni dawn a ni.
Semi final first leg hi December ni 1, Ningani zan dar 7:00-ah Bethlehem Vengthlang FC leh Chanmari West FC ten an khel ang a, December ni 2, Zirtawpni zan dar 7:00-ah Chanmari FC leh Aizawl FC ten an khel ve bawk ang.
Second leg hi December ni 8 leh ni 9-a khelh a ni anga, December ni 8, Ningani zan dar 7:00-ah Chanmari West FC leh Bethlehem Vengthlang FC te an inhmachhawn anga, December ni 9, Zirtawpni zan dar 7:00-ah Aizawl FC leh Chanmari FC an inhmachhawn leh ang.
Aizawl FC 2-1 Chanmari FC
(Bright Middleton Mends 6', F Lalremsanga 45+1') (Malsawmfela 56' penalty)
MoM: Jonathan Lalhriatkima (AFC)
Aizawl FC XI: Lalawmpuia, Jonathan Lalhriatkima, Ricky Lallawmawma, Brandon Vanlalremdika, Lalnuntluanga, F. Lalremsanga, William Lalnunfela, B. Zoramthara, Bright Middleton Mends, Lallawmzuala, Hmingthanmawia.
Chanmari FC XI : F. Lalmuanawma, Umunnakwe Ugochukwu Godswill, Ramfangzauva, MS Dawngzela, Lalmuanawma, R. Malsawmtluanga, Lalrinchhana, Vanlalbiaa Chhangte, Rochhingpuia, Malsawmfela, Dodoz.
Inkhelh tan atanga minute 6-ah Aizawl FC tan Brandon-a ball cross tha zet chu box chhunga awm Middleton chuan a ti goal a, si khat faiin Aizawl FC chuan hma an hruai. Aizawl FC chuan inkhel thunnun chhunzawmin winger Brandon-a'n goal thun belhna hun tha a hloh thung.
Chanmari FC free kick hlawh chhuah chu winger MS Tluanga chuan petin, Aizawl FC goalkeeper Awpa'n a dang hman hlauh a, a tlukna lamah a inhliam palh, T Mawia'n a rawn thlak ta a ni.
Chanmari FC chuan counter attack hmangin an nawr deuh thut thut a, winger Vanlalbiaa (Mabiaa) leh forward Sawmfela ten chance nei mahse Aizawl FC goalkeeper T Mawia tan hna hautak erawh a ni lo hlauh.
First half tawp tep added time-ah Aizawl FC chuan an goal hnihna an khung a, B. Zoramthara ball pek tha zet chu box pawn hret atang chuan Remsanga chuan mawi zetin a pet goal. Half time a nih chuan si hnih faiin Aizawl FC chuan hma an hruai.
Second half-ah Chanmari FC coach chuan Fela Zote leh Isak-a te a dah lut a, an nawr pawh a na sawt. Minute 56-ah Chanmari FC chuan penalty an hlawh chhuak hlauh a, Sawmfela chuan petin goal-ah a chantir a, he goal bak chu a luh chhunzawm tawh lo, 2-1 in Aizawl FC chuan hnehna an chang ta a ni.
Chanmari FC tan Dodoz a khel tha hle a, Fela Zote leh Sawmfea te nen goal dang an thawk chhuak leh dawn emaw tih laiin T Mawia an su tlang zo tawh lo, Chanmari FC chu Aizawl FC lakah an tlawm leh ta a ni.
Report : PC Lala