Aizawl District Football Association (ADFA) 1st Division League Season 2 final chu December ni 6, Thawhleh zan khan AR Lammualah khelh a ni a, Mizoram Police FC chuan 4-1 a Aizawl FC Academy hnehin an champion ta a ni.
Mizoram Police FC leh Aizawl FC Academy te hi League round-ah vawihnih in tawngin, Mizoram Police FC hian hnehna an chang ve ve a, final-ah team pahnih hi intawng leh in Mizoram Police FC bawk hi an chungnung leh ta a ni.
Mizoram Police FC 4-1 Aizawl FC Academy
(Lalfakawma 29', Lallawmawma 49',OG, Lalfakzuala 53',62') (H Lalnunzira 45+1' penalty)
Mizoram Police FC XI :- Andrew Lalhmingliana, Lalhmunmawia, Lallawmzuala, B Zoramthanga, Lalbiaknunga, V Laltanpuia, Lalbiakhlua, Lalsangbera, Lalfakzuala, Lalfakawma, Lalramtharmawia.
Aizawl FC XI:- Sangtluanga, Lallawmawma, Malsawmtluanga, Lalmuankima, Lalhmingmawia, Lalrintluanga, Lalbiakfela, Lalengmawia, Hmangaihkima, Ramsangliana, H Lalnunzira.
Final inkhelah goal nga lai alut a, Mizoram Police FC tan Lalfakzuala'n goal hnih khungin, Lalfakawma'n goal khat khung a, Lallawmawma chuan an lamah a ti goal hlauh bawk. Aizawl FC Academy tan H Lalnunzira chuan goal khat akhung ve bawk.
First half tan a ni a, team pahnih te an innawr tawn zak zak hnuah Mizoram Police FC chuan an chance neih hmang tangkai hmasa zawkin minute 29-ah defender Rinchhana ball cross tha zet chu forward Fakawma chuan tauh goal-in an hmahruaina goal akhunga, Aizawl FC tan huntawp dawn injury time-ah forward Zirtea chuan penalty an hlawhchhuah atangin an si phurh sutna goal-a khung ve thung a, 1-1 in chawlhlawk an hmang ta a ni.
Second half tan atanga minute 4 aral hmain Mizoram Police FC tan defender Zoramthanga free kick pet chu Aizawl FC Academy defender Lawmawma chuan an lamah atauh goal hlauh; 2-1 a ni ta; Lawmawma'n an lama atauh goal hnu minute 13 aral leh hmain forward Fakzuala chuan Mizoram Police FC tan goal hnih akhunga, 4-1 in Mizoram Police FC chuan hnehna an chang ta a ni.
Champion Mizoram Police FC hian Rs 15,0000/- leh Trophy an dawng a, pahnihna Aizawl FC Academy hian Rs 80,000/- an dawng thung. Fairplay-ah 1st Bn Academy thlan an ni a, Rs 50,00/- an dawng ve bawk.
Mimal Lawmmna dawng te hian Rs 1000/- leh Trophy an dawng vek bawk a ni. Best goalkeeper-ah Sangtluanga AFC Academy chu thlan a ni.
Best player leh Best Midfielder V Laltanpuia Mizoram Police FC
Top Scorer goal 12 khungtu Lalsangbera Mizoram Police FC
Best forward Lalbiakhlua Mizoram Police FC
Best defender Lalhmunmawia MizoramPolice FC
1st Division-ah hian club pariat an awm a, an vai hian pawisa fai an dawng vek bawk. FC Kukikawn hian pariatna an hauh a, Rs 15,000/- an dawng a, pasarihna 1st Bn Academy hian Rs 25,000/- dawngin, parukna Chawnpui FC hian Rs 35,000/- an dawng a, pangana Chaltlang FC hian Rs 45,000/- an dawng thung a, palina Ramhlun FC hian Rs 55,000/- dawngin, pathumna Venghlui FC hian Rs 65,0000/- an dawng thung a ni.