ADBBA-in Hmeichhia Tournament leh Referee Clinic buatsaih dawn

11th July 2018, 08:07PM

Kum 2018-19 tualchhung basketball season bul tannan Aizawl District Basketball Association (ADBBA) chuan hmeichhia pual tournament leh referee thar chherna tur referee clinic buatsaih a tum.

Division I, II, III leh Women's division club te tel theihna tur tournament lian ADBBA Cup vawihnihna chu September thla leh October thla atanga kum 2019 February thla thleng division tin te league huaihawt chhunzawm a tum bawk a ni.

Club 70 enkawltu ADBBA Executive Committee chu tun season-ah a vawikhat nan July ni 10, Thawhlehni zan khan Association office, Eureka Restaurant Treasury Square-ah season bul tan nan hmeichhia tournament July thla tawpah khelh tan nise tiin a rel a, chumi zawhah chuan tualchhung basketball hmasawn nan referee clinic huaihawt chhunzawm nghal a rel bawk.

Mizoramah hmeichhia basketball lar hle thin mahse, tunhnu hian a dai viau tawh a. Season hmasa a tang khan ADBBA hian hmeichhia club an ziaklut tan a, tun dinhmunah club paruk an in affiliate mek a ni.

Tin, Mizoramah basketball referee an awm nual tawh mahse, referee an indaih thei chuang lo a ni. ADBBA chuan nikum khan ramchhung basketball intel khawm lian ber BFI qualified referee leh tualchhunga qualified referee te kaihhruaina hnuaiah referee clinic buatsaih a, tunah hian clinic chhuak referee 10 te chuan referee ni sa te an tawiawm tha hle.

(adsbygoogle = window.adsbygoogle || []).push({});

Copyright © inkhel.com 2024. All rights reserved.