Aizawl District Basketball Association Division I final chu February ni 10, inrinni zan khan Chawnpui Sports Centre-ah khelh a ni a, Zarkawt Serpents in BC Bethlehem chu 64-60 a hnehin an champion.
Zarkawt Serpents hi MSL relegate hlim an ni a, team tha leh inringtawk tak niin MSL kai leh ngei tum an ni. BC Bethlehem hi MSL bul tan tirha playoff lo khel daih tawh, MSL kai tuma season 4 chhung inpuahchah lauh lauh tawh an ni a, team inbuatsaih nasa an nih avangin he final match hi Dream final tih hiala sawi a ni.
He inkhelah hian Zarkawt Serpents-in bul an tan tha hle a, first quarter score 27-10 niin Serpents-in point 17 in hma an hruai a, chak zawk turin rin an kai nghal der mai. First quarter-ah Serpents player, Lalramropuia'n off the ball-ah Bethlehem player Lalrinnunga a luin a tauh lui a, inkhel thei tawh lo tura hrem tur anih laiin vanneih thlak takin unsportsman foul chauh pek a ni a, a tawp chakna basket thuntu a la ni zui a, BC Bethlehem tan a runthlak hle ang.
BC Bethlehem-in first quarter break an hmang tangkai a, an coach Vanlalnunsanga'n a naute rawn fuihphurin second quarter-a an point inthlauhna sang tak an rawn insiamtha a, point 23 rawn thawk chhuakin 33-33 in half time an rawn khar thei a ni.
Serpents player, Guwahati tlangval, Shahil Sharma leh BC Bethlehem leh UBA player, Irakoze Kavakure Brian an langsar dun hle a, Centre palian Shahil leh point guard Brian te chu team pahnihte hmachhuan ve ve an ni. Third quarter-ah point inang chunga inkhel bul tan niin chak zawk tur sawi lawk a har a, an inbei tawk dun hle. He quarter-ah hian points an in lead chhawk a, BC Bethlehem in 7 points-in hma an hruai hman zet a, Serpents in rawn pawtthla leh thungin 52-49 in quarter an khar a ni.
Fourth tawp berah Serpents coach, Liansangpuia'n defence tiphuisuiin zone defence a khelh tir a, BC Bethlehem-in an paltlang hlei thei lo. Game a physical hle a, players an inngam tawn hle. Point an in nihrual chho leh a, quarter tawp lam minute 2 ala awmin score chu 60-60 a ni. Serpents tan hun tha a rawn inher ta. Point 4 an rawn thun belh leh hlauh mai. Second 55 ala awmin BC Bethlehem-in chak ngei tumin time out an la a. Chak tumin rawn nawr hle mahse Serpents-in point 4 a an hmahruaina an phak thei ta lo a. Zarkawt Serpents chu ADBBA Division I champion hmasa ber an ni ta a ni.
(adsbygoogle = window.adsbygoogle || []).push({});
A pumpui thlirin BC Bethlehem player, Brian hi an coach in chawl loin a khelh tluan tir zak a, basket attempt nei nual mahse point-ah a chantir thei lo a. Heti chung hian point 33 neiin rebounds vawi kua ala a, steal vawi 4 a nei bawk. Samuel Malsawmkima'n points 9 hlawhchhuakin rebounds vawi thum leh steals vawi 3 a nei a, PC Lalhlimpuia'n points 6 hlawh chhuakin rebounds vawi li a nei bawk.
Serpents hian palian Shahil an chhawr tangkai a, rebounds tum 26 lai lain point 23 a nei a. Lalhmangaihzuala'n point 10 leh rebounds vawi 10 neiin Lalramropuia'n
10 points, 3 steals leh 2 rebounds a nei thung.
(adsbygoogle = window.adsbygoogle || []).push({});