A tam thei ang ber inhnek duhtu Tyson Fury

03rd May 2018, 12:05AM

Tyson Fury chuan boxing khawvel a rawn dai leh dawn takah chuan thahnem a rawn ngai nghal hle a, kumin chhungin vawi 5 tal inhnek hman a duh thu a sawi.

November 2015 ah Wladimi Klitschko a hneh a, hemi hnu hian boxing khawvel atangin a reh zui vang vang a, kuminah a rawn kir leh dawn chiah a. WBA-IBF-WBO world heavyweight champion hlui hian June 9 hian Manchester Arena-ah boxing ring a luhchilh leh dawn a, a hmachhawn tur hi an la sawi chiang chiah lo a ni.

Fury (25-0, 18 KOs) hian promoter Frank Warren chuan 2018 chhung chu a tam thei ang ber inhnektir se a tih thu sawiin, a duh ber chu heavyweight title kawltu Anthony Joshua (WBA-WBO-IBF) leh Deontay Wilder (WBC) te hmachhawn a nih thu a sawi.

“Frank Warren chuan vawi tam tak chu awm mai mai lo turin min siam a tum thu a sawi tawh a, a sawi ang ngei hian a tih ka ring tlat a ni,” tiin Fury chuan a sawi.

“Theihtawpa buai hi pawi ka ti lo khawp mai a, heavyweight champion ni tawh zawng zawnga buai ber ka ni thei a. Kumin chhungin vawi 4 emaw, vawi 5 emaw ka inhnek maithei a, vawi 6 pawh a ni thei,” a ti bawk.

A sawi zelnaah “Joe Louis khan thla tin vawi khat inhnek kha a thupui thin a, kei pawhin khatiang chiah kha ka duh a. Kum khata vawi khat emaw, a tam berah vawi hnih emaw chauh inhnek chu a ho em mai,” a ti a.

‘June thlaah ka inhnek dawn a, July, August, September, October thlaah te chhunzawm zat ila ka duh a. Inhnek hi nuam ka ti a, ka kham thei lo a. Kumin chhungin vawi nga inhnek ka duh a, chutiang ti thei tur an awm a nih chuan kei hi ka ni mai,” tiin a sawi bawk.

Copyright © inkhel.com 2024. All rights reserved.