Katie Taylor chuan WBA world lightweight kawnghren a kawllai a humhim a, unanimous points hmangiin American boxer Jessica McCaskill a hneh.

Kum 31 mi Taylor hian October thla khan Argentine boxer Anahi Sanchez hnehin WBA world lightweight kawnghren hi a hlawhchhuak a, professional fight vawiriat a hmachhawn tawhah hnehloh ala nei lo.

Amateur lama vawinga lai world champion ni tawh Taylor hian 97-92 97-92 98-91 in McCaskill hi a hneh a, an inhnekna hmun hi London-a awm York Hall a ni.

Hnehna a chan hnuin Irish boxer chuan, "Inhnek ka hmachhawn tawha hautak ber a ni hial ang. Ka țhatna zawng zawng lantir a ngai a, hmachhawn a hautak dawn tih ka hiat avangin ka inpuahchah țha bawk."

"Ka tih tur ka hrechiang a hnehna ka chang leh thei hi ka lawm khawp mai. Boxing-ah hian sulhnu hnutchhiah ka duh a, kum țha tak hman hnua hnehna nen kum ka khar thei tur hi thil lawmawm a ni." tiin a sawi.

Inhnek dangah Conor Benn chuan Cedrick Peynaud a hneh ve bawk a, kum 21 mi Benn hian professional fight a hmachhawn tawh 11-ah hnehloh ala tawng lo a ni.