​2015/16 Premier League Preview : Arsenal

04th August 2015, 06:08AM

"Nakkumah chuan kan tha tawh khawp ang," tih tawngkam leh Arsene Wenger hi a inhmeh tawh hle. Wenger hian player chu a nei tha thin alawm, mahse inhliam vangin a player thate season tluanin a chhawr thei lo thin. Champion inbeiseina lian tak nei thin mahse a tawp lamah an zuih ral thin.

Kum 10 chhung teh meuh mai Premier League title midangin an chan khalh ta chu a ni a, FA Cup-ah chuan a zawnin tun kum hnih liamta chhung khan champion mahse Domestic league leh Champions league hi club ropuite lak tum ber a nih avangin tun season-ah pawh hian Wenger leh a hote hlawhchhuah tum ber a ni.

Pre-Season chu an hmang tha alawm

Season thar inbuatsaihna an nei tha hle, Arsenal hian Pre-season-a an team hmachhawn zawng zawng an hneh vek a, FA Community Shield-ah Chelsea chu si khat faiin an hneh bawk. Chelsea an hmachhawn tum khan an khel tha hle a, a bik takin an tlarhnung an fakawm.

Hetih lai hian Pre-season results hian league a nghawng nasa teh chiam lo ve thin. Season hmasa tan hma khan Manchester United khan Pre-season tour an hman tha khawp mai a, an game a mawiin, an khingpuite kha an hneh deuh vek. Mahse League an han tan chiah erawh an chebuai hle a nih kha. Pre-season performance atang nilovin, tuna an player neihte atang hian season preview nei ila.

An chet thatna chhan tur te

A hmasa berah chuan World Class goalkeeper Petr Cech an nei tawh, hei hian nasa takin Arsenal chakna thahrui a pe ngei dawn. Chelsea an hmachhawn tuma Oscar free kick a save te kha pui tak a ni. Game inhnehtawk tak karah chuan goalkeeper tha leh tha lo hian danglamna nasa tak a thlen thei thin.

Wenger-a'n a insawi ang deuhin, team balance nei tha tak an ni a, rei tak a inhliam hnuah Walcott a rawn kir leh tawh, pre-season pawh harsatna nei miah lovin a hmang tluan bawk a, season tharah fit takin bul a tan thei ang. Tin, Arsenal tan contract thar a ziak tawh bawk a, he English forward hi a inhliam lo a nih chuan Arsenal hmatawng chakna hnar a ni thei dawn tlat mai.

Sanchez that zia kan hria, Barcelona atanga Emirates Stadium a pan season khatnaah Arsenal tan competition hrang hrangah goal 25 lai a khung hem mai. Heng bak baka debut season hmang tha hi an tam em em bik lo. Khawi position-ah pawh tha fal an awm lova, chhe fal an awm bawk lo. Hei tak hi Arsenal chakna hnar tur chu a ni.

An chetchhiat theihna te

Champions League atangin Monaco-in an hnawtchhuak a nih kha, first leg an hmang chhe em a, second leg-ah an khel ropui, mahse an comback thei ta lo. An team-ah hian season liamta khan ngelnghehna tak tak a awmlo emaw chu aw tih theih kha a ni a. Team pahnih khat tha deuhin an hmachhawn a, mawi takin an hneh hnu lawkah chetsual an nei leh zauh thin.

Arsenal hian inhliam hrat player an kawl nual, Wilshere, Ramsey leh Walcott-te hian season tluanin khel ve thei selang chuan an tang khawng thei thin tur a ni a, Premier League, Champions League, FA Cup leh League Cup-te an khel thin. Tin, kan sawi ziah thin Krismas leh kum thar vuakvet match tawt takah player hliam an nei leh nual maithei.

Hengte ngaihtuah hian Arsenal hian squad khawng tak an nei lova, first XI chu an tha hle, chutih laiin keyplayer te inhliam laia an ai lo awhzo player tha bench-a thu an nei lo hian season tawp lamah a chet chhiat tir thin.


2014-15 Arsenal Stats :
Set-piece goal : 22
Set-piece atanga an chhuah : 15
Tan atanga minute 10 chhunga an goal khung zat : 15
Subs ten goal an khung zat : 5
Subs ten assists an neih zat : 2
An goal chhuah hunte : 0-15 : 1, 16-30 : 6, 31-45 : 6, 46-60 : 9, 61-75 : 3, 76-90 : 11. Total : 36

Zawhna chhan harsa tak tak te

1) Sanchez hi a khel tha reng angem ?

Arsenal tan a debut season a khel ropui hle, goal 25 lai a khung thei. Mahse World Cup atang khan he Chilean forward hian awl a la nei miah lo ! Copa America thlengin, Pre-season-ah a chawl a ni mai a, mahse a rei si lo, season an tan leh nghal tawh dawn si a, a debut season a phak tawh loh palh a hlauhawm hle.

Season liamtaa Sanchez thawhrah kan hria, Arsenal innghahna kan ti lo thei lo. Inhliam ta palh hlauh se tunge a ai awh zovang ?

2) Wilshere thatna tak tak kan hmu thei angem ?

Wilshere-a talent that zia hi chu tuman kan sawi nep thei lovang. Chutih laiin sawi tawh thin angin inhliam hrat ve tak a ni a, tun season hian Arsenal innghahna a ni dawn nge ? Bench lamah hun a hmang tam leh zawk dawn ? A dam thata, duh thala a khelh hi chuan midfield-ah chuan duhthusam a ni, defence a pui tha em em a, hmatawng lamah a hlauhawm bawk si. Season liamtaa West Brom laka a goal-te kha mitthlaah a la cham reng mai.

Chutih laiin field pawnah chanchin eng eng emaw neuh neuh a nei ve thin a, hei erawh Arsenal tan chuan thil tha em em a ni lem lo khawp mai.

3) Giroud hi champion puina khawp a ni em ?

Ka chhanna chu "Ni lo". Giroud hi centre-forward tha tak a ni chiang mai. Goal ropui tak tak leh class tak tak a khung nawk tawh bawk. Chutih laiin harsatna pakhat awm chu, a chet that tum chuan ani aia centre-forward tha an awm lovang tih hial khawp a nih laiin a chet chhiat erawh chuan ropui lo ve tak a ni a.

Chet that chang leh chet chhiat chang nei striker kawl hian Champion-na tur a dal thei ve tlat mai. Chutih laiin inkhel inhnehtawk tak kara, chance vawi khat chiah goal-a chantir thei striker Arsenal hian an mamawh, World Class striker an mamawh hle.

4) An defence hi an khawng tawk em ?

FA Community Shield-ah kha chuan an goal an veng hneh hle mai. An inrem tha a, Chelsea kha chance hlauhawm an pe tam lo. Mahse kan hriat reng tur erawh, khami tum khan Diego Costa a khel lo. Manchester United-a flop Falcao erawh an dang hneh hle.

Kha match kha chu an defence khawng leh khawng lo teh nan chuan a hman tlak lohvang. Arsenal hian Central defender tha pakhat tal chu an la mamawh niin a lang. Defender pakhat inhliamin season hmasa pawh a tibuai hle a nih kha.

Rin lawk dan

Tuna an squad en hi chuan Premier League title beisei ngam tur chu an ni chiang mai. Mahse season tluanin an squad a khawng tawk lo maithei. Hector Bellerin, Kieran Gbbs leh Nacho Monreal te hi defender tha tak tak ni mahse anni ho tur World Class central defender pakhat tal an mamawh a, World Class striker pakhat lalut leh phei selang chuan Premier League mai ni lo, Champions League title-te pawh Arsenal tan beiseiawm loh a ni dawn bik hauh lo a nia.

Kum tina League-a champion thin chu season tluana team khawngte an ni thin. Key player inhliam an awm mang loh chuan Arsenal tan season tha tak a nih ngei ka beisei a ni.

Copyright © inkhel.com 2024. All rights reserved.