Player-te chet dan engkim hi kimchang taka vawn a ni a, whoscored.com-in Europe league liana player-te ratings a pek atanga rating hmu sang player 10 kan rawn thur chhuak a ni.
Zlatan Ibrahimovic - PSG
PSG tana thawh hlawk tak Zlatan-a hian 2014/15 season-ah khan goal 19 lai khungin Ligue 1 title a club a lakpui a. Tun season-ah pawh goal khung hnem ber a la ni mek a, goal 15 lai a khung leh tawh a ni. Tin, a ram Sweden chu Euro 2016-ah a hlangkai bawk a ni.
Luis Suarez - Barcelona
Champions League-ah Barcelona a champion pui, final-ah Juventus lamah goal pawimawh a khung bawk. Barcelona-in treble champion an nih theih nan tha a thawh hlawk hle a, tun season-ah pawh goal khung a bansan thei lo. La Liga-ah goal 13 a khung tling leh tawh a ni.
Lionel Messi - Barcelona
Barcelona tana player tangkai ber a ni kan ti thei awm e. Kumin chhungin Club tana trophy lian pathum La Liga, Champions League leh Copa de Rey-te a club a lak pui a. Kumin chhungin club leh ram tan goal 51 a khung. Tin, assists vawi 26 lai a nei bawk a, Ballon d'Or winner ni tura rinkai ber a ni.
Neymar - Barcelona
Barcelona striker hian Barcelona a treble pui a, kumin hian Ballon d'Or dawng mahse a awmlo lovang. 2015/16 La Liga season-ah goal 14 khung tawhin top scorer a ni mek.
James Rodriguez - Real Madrid
Inhliam vangin 2015/16 season bul a tan tha thei lo. Heti chung hian kumin chhunga Real Madrid player khel tha ber zingah a inhlangkai tho mai. 2014/15 season khan trophy hlawhchhuak lo mahse a che tha hle a, goal 13 leh assist 13 lai a nei tling a ni.
Cristiano Ronaldo - Real Madrid
Kuminah Trophy chawi lo mahse mimal takin a khel tha hle a, goal pawh a khung hnem kher mai. 2014/15 season-ah khan league goal 48 lai a khung tling nghe nghe. Tun season-ah pawh goal 12 a khung tling leh ta a, Champions League Group stage-ah goal 11 a khung a, Group stage-a goal khung hnem ber record a siam ta a ni.
Alexis Sanchez - Arsenal
Tun season chawhma lama Arsenal innghahna a ni a, Krismas dawnah inhliam vangin a chawl a ni deuh mai a, 2014/15 PFA Fans' Player of the Year atan thlan a ni a, a ram chu Copa America-ah a champion pui bawk a ni.
Mesut Ozil - Arsenal
November thla khan Premier League player of the month atan thlan a ni. Tun season Premier League-ah assist vawi 15 lai a nei tling ta a, Europe league lian pali zingah ani aia assist nei hnem hi an awm hrih lo a ni. Arsenal an form chho em em bawk a, Arsenal innghahna a ni chho mek bawk a ni.
Riyad Mahrez - Leicester
Leicester City Premier League top-a hlangkaitu a ni kan ti thei awm e. Mahrez hian tun season Premier League-ah goal 13 khung tawhin assist vawi 7 lai a nei tawh bawk a. Europe player zinga form ber a ni mek a ni.
Nolito - Celta Vigo
Kum li lai a liam ta Barcelona a chhuahsan atang kha. Tunah zet chuan Barcelona-in lak kir leh an tum ruai tawh mai a ni. Tun season La Liga-ah a club Celta Vigo chu hma a sawnpui hle a, league goal 8 a khung tawh bakah assist vawi 5 a nei tling tawh bawk a ni. November thla khan a chet that em avangin Spain National Team-ah a vawi khat nan koh a ni ta a ni.
Note : An chetthat dan indawtin kan rem lova, Top 20 kan rawn tarlan huna rating nen zawng zawng kan rawn tarlang ang.