2014/15 Champions League final ah Spanish giants Barca chuan Juventus chu 1-3 a hnehin ropui takin UCL champion an ni ta. Tihian Barca hian tun season ah La Liga, Copa del Rey leh UCL nomawi te chawiin treble champion an ni ta a, treble champion vawi hnih ni thei hmasa ber niin kum sawm chhungin Champions League ah vawi li zet an champion ta bawk.

He inkhelah hian Rakitic, Suarez leh Neymar te chuan Barca tan goal khungin Morata chuan Juventus goal awmchhun a khung ve bawk. Final ah goal dang Neymar a'n a khung leh tak avangin tun season ah Ronaldo leh Messi te goal khung zat zet goal sawm lai a khung tling ve ta a, anni pathum hi tun season a goal khung hnem ber an ni ta a ni.

Barca legends Xavi chuan a club tana a game hnuhnung ber khelin Champions League nomawi a chawipui leh ta a, Barca tan trophy 25 zet chawi tawhin, Spanish club pakhat tana trophy chawi hnem ber record a siam ta bawk.

Juventus 1-3 Barcelona (FT)
(Morata 55') (Rakitic 4', Suarez 68', Neymar 90+6')
Line up
Juventus - Buffon, Lichtsteiner, Barzagli, Bonucci, Evra (Coman - 89' ), Marchisio, Pirlo, Vidal (Pereyra - 79' ), Pogba, Tévez, Morata (Llorente - 85' )
Barcelona - ter Stegen, Dani Alves, Piqué, Mascherano, Alba, Rakitic (Mathieu - 91' ), Busquets, Iniesta (Xavi - 78' ), Messi, Suárez (Pedro - 96' ), Neymar

First half inkhelah Barca an chungnung lawr laka, goal pawh an khung hma hle. Inkhel an tan chauh tihah Rakitic chuan Barca hmahruaina goal chiang zetin a khung nghal. He goal hi 4' a lut niin, mual dinglam atanga Messi diagonal ball pek tha zet chu mual veilamah Alba chuan lo dawngin Neymar a pass ve leha, Neymar chuan box chhunga rang taka Iniesta tlan lut hmuin a pass ve leh nghal zat bawka, Iniesta chuan Rakitic tana siam sak nghalin Rakitic chuan chiang zetin goal ah a lo khung a ni.

8' a Morata a'n mual dinglama hlauhawm taka ball a tlan luhpui hnuah tha zetin a cross a, inkhelh tirh atanga foul cheh nghal em em Vidal chuan box pawn ah a cross ball chu lo dawngin goal a a shot chu a over hlauh. 11' ah Vidal chuan Busquets laka a foul leh avangin yellow card a chawi ta nge nge a ni. 13' ah Barca in goal an khung leh teuh hle a, Messi atanga a ball dawn chu Suarez chuan fing zetin Alves tan a siam saka, kawh zeta Alves strike chu goalkeeper tawnhriat ngah tawh tak Buffon chuan tha zetin a lo dan sak ve leh bawk.

First half chhungin Suarez leh Neymar ten Barca tan chance tha an neia, goal erawh an khung lo thung. Morata leh Marchisio te chuan Juventus tan chance nei ve bawk mahse inkhelh thawhkhatna hun tam zawkah an khingpui Barca an khan lo hle a, harsa lo takin Barca in inkhel thawhkhatna an thunun a ni ber.

Inkhelh thawhhnihna ah Juventus an insiam tha a, goal thun nan hun an duh rei bik lo. Suarez-a chance neih atanga an him hnu 55' ah Morata hmangin an si phurh sutna goal an khung a. Box dinglam atangin hlauhawm zetin Lichtsteiner chuan a cross a, chu ball chu Tevez chuan lo la in rang takin a shot nghala, Stegen chuan nam per thei mahse changtu neilo Morata hmaah chiah tla in, Morata chuan harsa lo zetin goal ah a chan tir ve leh a ni.

An si phurh sutna in Juventus player te a chawk phur hle tih an chet dan atangin hai rual a ni ta lo, inkhela bet zawk ni kha goal hmaah an hlauhawm chhunzawm zata, Pogba leh Tevez ten goal an khung chhunzawm teuh hle. Barca an zam mai duh bik lova, Juventus phur tharna 68' ah nuai reh sak ve lehin, Pogba a'n penalty shout a neih hnu lawkah counter-attack hlauhawm tak atangin Messi chuan tha zetin goal ah a shot a, Buffon bawk chuan a kut phar leh hman mahse a vannei zo ta bik lo. A ball nam per chu Suarez chuan rang takin a bawh nghala, goal ah a chan tir zui ta a ni.

Neymar chuan Alba cross atangin goal a thun ve bawka, a tauh hnua a kut a per avangin pawm sak a ni ta lo a ni. Hun tawp hnaih tak takah long range shot nei hreh ngailo Marchisio chuan Stegen tana namchhuah hman chiah chiah turin shot a nei ve leha, a goal hmasa pawmsak ni lo mahse champion nemnghehna goal ni turin Neymar chuan last minute ah Barca goal thumna leh tun season he inelna a a goal 10-na a khung ve ta nge nge a, Barca chu champion a puan an ni chhunzawm ta a ni.